Monday, May 18, 2015

ஓநாய்கள்


ஓநாய்கள்

விரட்டி வந்ததின்
நிறம் தெரியவில்லை
ஓநாய்தானா?
தெரியவில்லை
ஆனால்
நாயில்லை
முன்பொரு இரவில்
வாகன வெளிச்சத்தில் பார்த்திருந்த
கழுதைப் புலி
செந்நாய்
பல்லிழந்த நரி
இவையெதுவுமில்லை

ஓநாயாய் இருக்கலாம்

இருள் விலகியிராத கருக்கல்
மரங்கள் தூங்கும் சரிவு
சகலக் கருமை
ஒரு திசையிலிருந்து உறுமல்
இன்னொன்றின் வன்மச் சீற்றம்
பக்க வாட்டு ஊளை
பின்னிருந்து இன்னொன்றின்
கணுக் கால் கவ்வல்

ஓநாய் கூட்டம்தான்

சதையொழுகும் காலினை
இழுத்துக் கொண்டு
ஓடமுடியவில்லை
மலைச்சரிவின்
ஒரு முனையிலிருந்து
உருளுகிறது உடல்
நீர்பூச்சி வளையம் வளையமாய்
சுவாசித்துக் கொண்டிருக்கும்
ஓடையின்
குட்டி நீள் கரங்கள்
இன்னொரு நீர்பூச்சியாய்
என்னையும் வாங்கிக் கொள்கிறது

குமிழ்களை
உண்டாக்கியபடி
உள்ளமிழும் என்னுடல்
ஓநாய்களின்
நிறக் கவலையை

விட்டிருக்கும்.

No comments:

Featured Post

கோவேறு கழுதைகள்

இமையத்தின் கோவேறு கழுதைகள் நாவலை   நேற்றும் இன்றுமாக வாசித்து முடித்தேன். இருபத்தெட்டு வருடங்களுக்கு முன்பு எழுதப்பட்ட புதினம் இ ப்போது வாசி...